ممكن تفضل تحاول تبقى كل حاجة الناس عايزها ....ممكن تنشغل بمشاكلهم و تحبهم و تستنى كلامهم الكويس عليك
بس بيفضل سؤال موجود مستني منك شجاعة كفاية عشان تجاوب عليه ..أجابة صح مش أجابة من بتوع برامج التليفزيون
ليه ؟...ليه بتدور على الناس ؟...ليه بتدور على نفسك في عينهم ؟
الشجاعة أنك تعترف أنك زيك زي غيرك من البشر...شخص أناني..عمرك ما حتحط حد قبلك ..أو حتفضل مصلحة حد فوق مصلحتك
كل الفكرة أنك حاسس أنك ناقص حتة...و حتة كبيرة...لما بتشوف نفسك في عيون الناس حلوة بتفتكر أنك بقيت كامل ..فبتنسى
بس بترجع آخر النهار تفتكر أن الحتة ديه لسة ناقصة
أنت لسة ناقص حتة كبيرة أوي...حتة مراية الناس لا يمكن تراجعها
إمبارح مسكت ورقة و قلم...كانت أول مرة من فترة طويلة أمسك ورقة و قلم و أحس أني مش عايزة أكتب حاجة
مش عايزة أكتب عن الحب و القلوب المكسورة و بكرة اللي مش بيجي و القهوة اللي بيردت و ماحدش شربها !
عايزة أكتب أنا عملت إيه...حققت إيه في سنين عمري العشرين عشان بس أبقى فاهمة أنا ممكن أحقق إيه في العشرين سنة اللي جايين ده لو إنكتبلي أعيشهم
مش حقول أنهم عشرين سنة فاضيين...لكنهم عشرين سنة ناقصيين
ناقصيين حاجات كتير أوي...ناقصيين حتة كبيرة
و صاحبتهم ناقصها حتة أكبر
بأختصار أنا ما أتغريتش مع الناس ...ما حبتش حد أكتر و لا بقيت بكره حد
ما تأثرت بصدمات و أخدت جنب
و كل قراراتي المصيرية عن التغيير و البعد و الأنانية و الهبل ده كله فشنك
كل الحكاية بس أني عايزة أرجع الحتة اللي ناقصة....بس
ليست هناك تعليقات:
إرسال تعليق