طول عمر جدتي تقولي أن اللي بيحب حد بيشوفه
بيشوفه و بس , لا بيشوفه أحلى و لا بيشوف الحلو اللي فيه...هو بيشوفه
و عشان بيشوفه , بيشوفه بجد...بيحبه و بيستحمله مهما كانت عيوبه
ساعات كتير لما بشوف نفسي مش حلوة ف المراية أو لما بشوف لنفسي صورة وحشة أو حتى صورة حلوة لكن عيني مش عايزة تتقبلها , بفتكر زمان لما كانت جدتي بتقولي "يا هانم"
الله يرحمها عمرها ماندهت عليها بأسمي , على طول كانت تنادي عليا بأسم دلع مرادف للجمال أو الرقي
ساعتها بس أفتكر أن اللي بيحبك بيشوفك...بيشوفك زي ما المفروض يشوفك
زي ما أنت فعلاً
و أحبها أكتر....عشان كل مرة كنت أروحلها, كانت بتشوفني
و تقولي أنتِ جميلة و عيونك جميلة ...أحلى من أي واحدة فينا
كل مرة كنت أروحلها كانت بتشوفني , و برضه بتعرف تحبني أكتر ...أكتر من أي حاجة
أنا نفسي دلوقتي أشوف جدتي , و لو لمرة واحدة بس
نفسي أشوفها و تقولي أنها لسة بتشوفني ...و أني جميلة ...أنها لسة بتشوفني و شايفة أني جميلة
يمكن لما أسمع منها الكلام ده , أنسي كل صورة وحشة ليا , و كل مرة بصيت فيها ف المراية و عيني ماعرفتش تتقبلني
يمكن
طول عمر جدتي تقولي أن اللي بيحب حد بيشوفه
ردحذفبيشوفه و بس , لا بيشوفه أحلى و لا بيشوف الحلو اللي فيه...هو بيشوفه
و عشان بيشوفه , بيشوفه بجد...بيحبه و بيستحمله مهما كانت عيوبه
منتهي الروووووووعة في تفسير الحب..تفسير متقن الصنع ومزين بالبساطة
تحية ورديةلك ولكل الجدات الرااااائعات الذي جعلننا بصفاء روحهن ما نحن فيه الأن