كلاكيت أول مرة : كيكة الشيكولاتة
ماما : "هي حلوة بس الدقيق فيها زيادة شوية , و كنتِ معليا الفرن عليها
خدي بالك المرة الجاية"
كلاكيت تاني مرة : كيكة القهوة
* أنا لنفسي : " كوبية دقيق أقل المرة ديه...وطي الفرن يا جيلان و حياة أبوكي "
ماما : " هي حلوة بس المرة ديه زودتي السكر و برضه لسة الدقيق كتير "
كلاكيت أول مرة : مكرونة بالباشميل
ماما : " الباشميل كلكع منك عشان حطيتي اللبن على النار و مافضلتيش تقلبي
معلش المرة اللي جاية خدي بالك"
كلاكيت تاني مرة : مكرونة بالباشميل
ماما : " الدقيق كتير يا جيلان , أنتِ مش معاكي المقادير ؟!"
النهاردة كان كلاكيت رابع مرة شوربة خضار
"ملح زيادة , مكرونة زيادة و مياة قليلة"
مفيش حد ف الدنيا مش بيعرف يعمل شوربة خضار مقبولة من أول مرة , خصوصاً لو معاه المقادير
إشمعنى أنا اللي دايما بصمم ما أمشيش على المقادير الصح , بالرغم من أني عارفة أن المشي ورا حدسي بيطلع الحاجة ف الأخر مش قد كده ؟
كل مرة تبقى الورقة قدامي و أصمم أزود حاجة و من جوايا ببقى مقتنعة أنها حتطلع الحاجة مختلفة و أحلى ...و حتثبت لي أني طباخة ماهرة بالفطرة !
بس مش دايما مخالفة المقادير بيبقى الحاجة اللي المفروض تتعمل
أنا بتعلم الصبر و المشي على المقادير زي ما هي مكتوبة ...بتعلم حاجات كتير المفروض أعملها ف حياتي و أنا بتعلم الطبيخ
يمكن المرة اللي جاية تطلع الحاجة مظبوطة , لا زيادة دقيق و لا ناقصة ملح
ينفع أقولك ع السر
ردحذفو ماتقوليش لحد
هسسسس
.
.
.
بطلي تطبخي خااااااالص
و بعدين إذ فجأتن هاتلاقي نفسك بتمشي ورا حدسك و بيطلع الأكل طعمة مختلف و حلو جدا
أرمي ورقة المقادير ..
جيلان ماينفعش تطبخ من ورقة المقادير زي بقيت البنات اللي بيطلعو م المصنع
;)
أنتِ عارفة أني النهاردة و أنا راجعة البيت قلت حجيب فانيليا و بيكن بودر و أجرب أعمل كيكة بس لوحدي من غير ورقة مقادير
ردحذفطلعت أحلى من كل مرة...بجد
عشان المرة ديه كنت بعملها و أنا مستمتعة و بسمع أم كلثوم
عندك حق يا رضوى..فعلاً كان لازم أرمي ورقة المقادير من أول مرة طلع الدقيق فيها زيادة :))