حقيقة أني طول عمري في مدرسة بنات بس كان ليها أيجابيات كتير أوي.....و سلبيات أكتر .....و أكتر السلبيات متمثلة في الصدمات اللي بقيت بخدها كل يوم .....يعني مثلا زمان أيام المدرسة لما واحدة فينا كان يحصلها أي موقف مكانتش أبدا حاجة غريبة أن معظم -ده لو مش كل- بنات المدرسة يقفوه جمبها...... في الأيام دي محدش فينا كان بيحس أن ديه حركة جدعانة و أنها حركة شهامة و لا أي حاجة من الحاجات ديه .....بالعكس ده أحنا كنا بنحس أن ده واجب علينا كلنا.... بنت بنت...... و أن الحاجة الغريبة أن واحدة متعملش كده ......و علي فكرة مش قصدي بالموقف ده حاجة كبيرة..... لا خالص ديه ممكن كانت تبقي خناقة بين بينتين..... أو بنت و مدرسة...... واحدة مضيقة و بتعيط..... يعني من الأخر كان ممكن يبقي موقف أعبط من العبط .....و مع ذلك كنت تلاقي كل البنات واقفين جمب بعض...... ساعاتها مكنتش بحس أن فيه حاجة غلط ......و لما أبقي متعصبة من حاجة أو لية حق مكنتش بستغرب لما ألقي واحدة يمكن منكنش حتي صحاب أتحمأت و خدتهوليه ......أو قامت رمت بوقيين جمديين من غيظها ......و لأني مكنش لية أحتكاك مباشر مع أي ولد و متحتيتش في موقف يستحق أن حد يقف جمبي أو أني أقف جمب حد .....فأقتصرت فكرتي علي مواقف قرايبي الولاد و طبعا والدي .....و للأسف يارتها ما أقتصرت عليهم لأني لحد من أققل من سنة كنت مقتنعة أقتناع تام أن الطبيعي..... و الطبيعي جدا أني مينفعش أبدا أعلي صوتي أو أفكر أتكلم و أقوم أخد حق لية في أي حاجة مهما كانت طول ما أنا واقف جمبي "راجل"..... و أنه ببساطة مينفعش أني أبقي واقفة مع "راجل" و أسيبه واقف و أتصرف في حاجة من دماغي كده .....مش ديكتاتورية أو أضهاد .....بس أحترام لشخص و رجولة الشخص اللي واقف معايا .....و تقدير طبعا أنه من الطبيعي أن لما يبقي بنت واقفة مع "راجل" حتي و أن مكانش فيه بينهم صلة قرابة مباشرة أنه يحميها من أي موقف تتعرضله في وجوده و يخدلها حقها في أي موقف يشوف أن ليها حق فيه..... و لحد فترة طويلة أوي كان بالنسبة لي هو ده الطبيعي و الطبيعي جدا .....و كان كل شيء حواليا من مدرسة و عائلتي مديني الأنطباع أن هو ده بالظبط اللي حشوفه لما أخرج للعالم اللي برة .....و فعلا فضلت أتعامل مع كل اللي حواليا علي هذا الأساس .....أقف جمب أي بنت في أي موقف تتحت فيه سواء أعرفها أو معرفهاش..... و معليش صوتي و لا أسبق "راجل" في رد الفعل في أي موقف أتعرضله في وجوده..... و طبعا أستنكر رد فعل أي بنت "مسترجلة" تقوم تزعء في وجود "رجالة"..... لكن للأسف مع الوقت لقيت أنه الطبيعي حاليا هو العكس تماما ......و أني لو مقمتش جبت حقي بنفسي محدش من "الولاد" اللي قاعدين حواليا حيجبهولي..... أني لازم أبقي أخت ...."صحبت" ....قريبة..... خطيبة ....مرات..... حد أو كل ده لحد معروف في القاعدة عشان أخد حركة "جدعانة" من حد ......لا كتر خيركه كلكم أنا لساني كفيل بيا ......ساعتها بس فهمت أن البنات طول مكانوش مسترجلين..... هو ببساطة "الولاد" اللي معاهم هما اللي مكنوش مسترجلين كفاية .....و أنه للأسف هي ديه بقت القاعدة بعد ما كانت زمان أستثناء.....و أن الطبيعي أنك متلقيش أنثي رقيقة و هادية زي زمان لأن مبقاش فيه "راجل" حازم و صارم و محترم زي زمان .......أنه بقي لازم أنا أقوم أخد حقي و ألا ببساطة شديدة حيضيع عليا ......و أنه لو ضاع عليا محدش من اللي كانوا قاعدين ساعاتها حتتهزله شعره....... و بناءا علي ذلك يسعدني أني أقول أني حفضل "بنت مسترجلة" فيما يخص الحق .....و الغلط و الصح .....و أي حاجة ليها علاقة بالمبدأ و الضمير ....ألا في حضور أي "أستثناء"ء......
ليست هناك تعليقات:
إرسال تعليق