كان يوم حلو و الله
كان يوم هادي كده
لقيتهم بيقولوا راوية جابت بنت
"شبهك أوي"
"حقيقي"
كانت ساعتها لسة كرمشة وشي ماعرفتش تخد ضحكتي
"واخدا عيونك و أبتسامتك"
"عيوني و أبتسامتي
لا لا ديه قمر هو أنا ضحكتي حلوة كده
و لا عيني حلوة كده
ديه عينيها حتي واسعة و عسلية
يارب ماتشوفش بيهم غير الفرح و الألون"
كنت فرحانة بيكي أوي
من ساعة ما أتولدتي ماسبتيش حضني كنتي تقومي أأكلك و أغيرلك و أنيمك تاني في حضني
هو أنتي فيه زيك"
لسة فاكركي
لسة فاكركي لما كنتي بتقاعديني علي رجليكي و تحكيلي الحكايات و تفضلي تغني
"خضرة الشريفة أنا حبيت…."
يييا يا جدتي لسة ريحة المسك اللي بتفوح منك ماليا قلبي
لسة فاكرة لما كنتي تخديني و تنيميني علي رجلك و ترقيني
"قل هو الله أحد ….
ربنا يحميكي و يسعدك و يملا أيامك فرح
يحميكي و يرزقك و يبارك فيكي"
لسة فاكرة أيام ما كنت بنام في حضنك
لسة فاكرة حضنك الدافي و حنيتك
يييا يا جدتي لسة ملمس ضفاير شعرك الأبيض الناعم علي خدودي
لسة فاكرة ضحكتك و أنتي بتقولي لأمي بنتك بيضة بياض الهوانم بتوع زمان
بيضة قشطة و تطبعي بوستك علي رأسي
لسة فاكرة كوبية الشاي اللي كنتي بتعمليها لي من ورا ماما عشان كان ممنوع علينا الشاي
و تقعديني اشربها جمبك و أنتي بتسمعي الشيخ الشعراوي علي الراديو الصغير بتاعك
و تفضلي تقوليلي" سامعة ربنا يكرمه"
يييا يا جدتي لسة صوتك و أنتي بتقري قراّن في صلاة الفجر بيطمني
لسة فاكرة يوم ماكلمتك عشان أقولك أني حفظت أسماء الله الحسني
لسة فاكرة أد أيه كنتي فرحانة بيا
لسة فاكرة أنك ماملتيش أني كل ساعة أكلمك عشان أسمعهملك
لسة فاكرة أن في كل مرة كنت أقولهملك كنتي تسمعيني و تسمعيهم معايا و تفرحي بيا و الأهم من ده كله تحسيسيني بفرحتك بيا اللي بتزيد
يييا يا جدتي محدش أستحمل شقاوتي زيك
لسة فاكرة أيام الأعياد
لسة فاكرة الهدايا اللي كنتي بتجبهالي من كل عمرة تطلعيها
لسة فاكرة الفانلة بتاعتي اللي كنتي تخديها عشان تمسحيلي بيها علي الكعبة و أفضل لبساها بعدها لحد ما ماما تقلعها لي بالعافية
لسة فاكرة مياة زمزم اللي علمتيني أدعي قبل ما أشربها و كنتي دايما تقوليلي أنتي قلبك ابيض ربنا حيستجيب لدعاكي
ييا يا جدتي عمري ما قبلت قلب أبيض زي قلبك و لا عمري حقابل حد في حنيتك و لا حترمي في حضن أدفي من حضنك
ياريت عينايا حلو زي عينيكي و لا أبتسامتي دافية زي أبتسامتك
ياريت قلبي أبيض زي قلبك
ربنا يعطيكي الصحة و العافية و يطولنا في عمرك
واحشتيني أوي
جدتي ربنا يعطيها الصحة
بقي أنا عينيا أحلي منك
ده برضو أسمه كلام يا حبيبتي
ليست هناك تعليقات:
إرسال تعليق